一提起全州，就諗起拌飯，跟住就係韓屋。一係唔嚟，千里紹紹一場嚟到全州，冇奶油唔嚟過韓屋初體驗家嘛係咪先？之但係全州咁多韓屋，點揀好呢？上網搵呀搵，竟然俾我發現到全州韓屋嘅表表者學忍堂。
學忍堂究竟有乜巴閉呢？最巴閉（in my view) 係Running Man第124集都係住响嗰度就知唔講得笑。佢哋嘅官方網站只有韓文，要預約一係打電話一係用E貓。普通韓屋一晚通常只係要幾百蚊港紙，但係學忍堂包早餐一個人要1000蚊好喇脷呀。。。之不過人家係成個全州歷史最悠久嘅韓屋，話晒有一百年歷史。。。 越睇越心思思想住。。 難得同行隊友都有豁出去嘅決心所以我哋決定一試，睇下佢真身究竟有幾厲害。之不過要訂都唔係咁容易，因為佢哋覆E貓閒閒地一兩個星期，真係少D耐性都唔得。好彩最後都比我哋Book到嗰間本館嘅百年VIP房 （佢哋嘅客房大概分布响三組建築物唔夠十間房，本館，Sarangche，同埋Jinsuheon，其中本館最貴亦都係最耐歷史（劉在石同光洙住過），Sarangche （即宋智孝同韓孝珠住那間）有40年歷史，Jinsuheon就大概起左50年左右，係由幾間細房組成亦都價格最相宜）
入住嘅時候都發生咗D小趣事。話說我哋一早去到全州，食埋個拌飯，再施施然步行去韓屋村，諗住先去學忍堂放低D行李。雖則明知check in時間未到（兩點正），心諗都應該有人接應。由於學忍堂差不多是當地地標，所以不難找，之但係搵係搵到，大門卻深鎖。。 拍又冇人應門 （韓屋大門，我哋幾驚拍拍吓整爛人家嘅歷史文物）門口貼咗張紙話有乜事打電話，唔好拍道門（唔好意思，已經拍到差唔多爛左），最搞笑係電話冇人應。。冇。。。人。。。。應？？？？？ 幾驚唔知係咪墮入陷阱方知太糊塗。。。 開始胡思亂想唔知今晚駛唔駛响全州瞓街。。 好彩。。。 朋友隔咗一陣終於打到有人聽啦。原來道門只要响個窿仔度伸隻手入去自己可以打開架。。
外邊圍著高牆所以一般人係睇唔到入面，一打開門即刻見到好靚嘅學忍堂。不過先來招呼我哋嘅係佢哋養嘅小狗，叫achi，好cutie呀！
我哋間房係位於正中央嘅本館，大概110平方米，再分兩間房連客廳（不過客廳在吃飯嘅時候要同本館另外一間房嘅住客共用）。
睇下房間幾傳統，果D漆器衣櫃真係好靚呀！不過呢，瞓硬地真係唔係咁舒服，我瞓到腰骨都梗埋。仲有如果關哂所有門窗又會焗得滯，所以我哋打開咗D門。。。 成晚又驚百年古宅唔知會唔會有D乜嘢東東出沒喎。。。但係點都要試一次，體驗下韓屋，下次睇韓劇先會更加有共鳴架嘛。
其中一角嘅小書枱，好趣緻小巧。
牆上的壁畫
另外一間房嘅門口
這裡就是客飯廳
到處都是古董
女仔當然最關心個洗手間，我諗呢度嘅浴室響韓屋嘅standard黎講應該算得上係超豪華。
最搞笑係個廁所叫解憂所。不過，雖然有兩格，但係偏細，所以我哋嘅大份男性朋友寧願去公家廁所。。。
這個後生仔就係學忍堂第三代傳人，就係佢阿爺當年起這間學忍堂。佢不單止帶我哋去參觀本館嘅閣仔，仲親自泡茶比我哋飲添。
好古老嘅留聲機呀，平時睇電視就見得多，真身都係第一次見。
由閣樓小窗望返出嚟嘅景色。中間就係之前講爭啲拍爛嗰度大門。
梗係要響本館學忍堂個金漆招牌下邊留個影啦！
本館全貌
本館對出嘅庭園
佢哋仲有個百年古井，唔知裡面會唔會有。。 D咩呢可。。。
還有不得不提佢哋嘅早餐，好家庭feel，（佢哋後園放哂大大小小嘅醬缸，所以D醬應該係佢哋親自醃製嘅），雖然唔係乜嘢名貴菜式，但係我覺得好溫暖好好味呀。我哋差唔多清晒碟咁滯。
最後依依不捨咁要告別學忍堂，雖然只係短短留宿一宵，但係真係一個好難忘嘅經歷。就連achi都唔捨得我哋走。。 Achi，有緣再會啦！（呀，仲有呀，我哋第二朝原本一早諗住搭的士去內臟山，學忍堂主人見call唔到的士，竟然親自揸車送我哋去搭巴士。。。真係好感動佢哋對人客嘅貼心! 俾個Like佢哋！）
