曾經有人話過：「無去過阿里山睇日出嘅話，你唔好話自己睇過日出。」
小妹覺得呢句話唔係太精準。難得天未光就爬起身、山長水又遠咁去到阿里山，無理由唔搭埋觀日小火車上祝山觀景台睇日出啊？
果頭先話睇完倒數晚會，轉個頭小妹就出發去睇日出，成件事都幾熱血。
喺車上補眠咗一陣，落車果一刻...
「媽！好凍啊！」
感激包車叔叔喺人山人海嘅7-11掉低小妹，一支箭就跑入去買返碗關東煮先！暖肚後就排隊搭火車喇！（包車叔叔一早幫我哋買咗火車飛，yeah！）
上到祝山，多人到呢...
究竟我前面有幾多人呢?
黎明時份，我覺得呢度好溫暖。
小妹已經數唔到喺佢前面究竟有幾多層人群。果一刻就好似行緊年宵市場，即係前面啲人又唔郁，後面啲人又係咁湧上嚟咁。雖然又凍又攰，但見到晨光開始慢慢出嚟同大家揮手，身邊開始出現延綿不絕嘅快門聲同埋歡呼聲，其實都好滾動嘅。
晨光第一線。
大家都好努力去記得最美嘅一刻。
或者呢個係我暫時見過最靚嘅日出。
陽光燦爛的日子伴漂亮的雲彩。
太陽伯伯完全爬哂出嚟之後，小妹就搭返小火車落去阿里山站，向阿里山國家風景區同埋巨木群棧道嘅方向進發，進行一吓光合作用。
阿里山國家風景區進行光合作用，請勿打擾。
沿途除咗有好多巨木之外，仲有好多旅行團嘅團友喺度大聲喧嘩，原本勁眼瞓嘅小妹都俾佢哋嘈醒哂，佢哋對小妹真係好。
Hello！阿里山小火車。
連續活動咗十幾個鐘，小妹真係頂唔住喇，所以佢喺阿里山食埋午餐之後就返民宿補眠，順便要準備睇日落lu。
一句講哂：爬到咁高嘅地方睇日出，記住要帶備足夠嘅保暖衣服啊！
更多遊記:遊。筆。攝。80園地
