關閉地圖
暫無當天行程

廣島八日遊

  • Bettypanda
  • 2015年10月17日
  • 8177 次瀏覽
  • 2 個留言
  • 2015年10月04日
遊記開始

第 1 天 (2015/10/04) D1

廣島機場

第一日去到廣島已經大概下晝五點。廣島機場真係幾細下,唔使15分鐘已經過咗海關同攞埋行李 - 真係好快。跟住行咗去國內線去搭機場巴士入市區 - 機場巴士有7天來回票但係因為我去八日所以唔可以用 :(

東橫INN 廣島站新幹線口

由機場去到市區大概要45分鐘所以去到酒店已經差唔多六點啦。今次住嘅Toyoko Inn 好近機場巴士站只要行3分鐘左右就到(離新幹線站都係五分鐘)。酒店附近都係住宅區剩係得一啲便利店,但係好處係近新幹線方便我哋之後嘅行程。早餐都唔錯值得一食。

第一個對廣島嘅印象係好鄉下,繁忙時間都冇乜車同埋冇乜人。Check-in完已經差不多七點,車站附近啲街都冇乜人所以我哋決定去食廣島最出名嘅廣島燒八昌!

八昌

但係冇諗到星期日晚都有咁多人排隊,我哋等左成40分鐘先入得去。好幸運地我哋可以坐counter位,睇住師傅煎D廣島燒。原來佢哋煎廣島燒都好有學問,有一邊嘅師傅煎緊椰菜,另外一邊嘅師傅炒麵,最後再加一隻蛋再煎 - 大大話話都煎左成半個鐘。我哋中間都叫咗其他小菜例如煎墨魚同埋牛扒。中間我諗D夥計搞錯左order,個大師傅不斷用日文鬧佢地!

呢間餐廳都幾出名,有好多日本嘅遊客都喺度排隊。如果有時間等我都建議大家要試一試。

八昌
10-6 Yagenbori, Naka Ward, Hiroshima, Hiroshima Prefecture 730-0027, Japan
https://goo.gl/maps/LY5dPw7hiC92

星期日晚都咁多人係到排隊


煎墨魚 - 可以點旁邊D鹽。


煎牛扒


等左至少半個鐘嘅廣島燒 - 好大分!


第 2 天 (2015/10/05) D2

JR宮島口車站

因為買咗七日嘅JR pass,可以任搭所有山陰山陽線嘅JR同埋可以坐去宮島嘅船。由廣島站坐JR 去宮島口車站大概要40分鐘,車站一出嚟就已經見到個碼頭 - 交通好方便。唔知點解廣島有好多鬼佬遊客反而中國,香港台灣人就冇乜。

成個船程大概十分鐘 - 記住一上船記得要霸出面嘅位影個大鳥居。

坐去宮島嘅船 - 車都可以上去


船上影到嘅大鳥居


宮島

碼頭一出來已經見到好多可愛嘅鹿。但係我諗啲鹿都幾肚餓下,居然食左我手上嘅地圖! 我都唔知原來鹿係會食紙嘅...我不斷想抽返我張地圖但係隻鹿咬住唔放。

食咗我地圖嘅鹿!


懶洋洋嘅鹿


小鹿baby


嚴島神社

碼頭行去嚴島神社大概十分鐘,其實一路睇風景一路睇吓啲可愛嘅鹿(不過要小心佢哋食咗你嘅地圖)好快就到。我哋啱啱好遇到退潮可以行落去影個大鳥居...可惜今日天氣唔係咁好,天有啲陰,如果有太陽嘅話啲相會更加靚。

可惜係陰天


由火燒前影出嚟嘅大鳥居


牡蠣屋

因為朝頭早幾早出發同埋淨係食咗Toyoko Inn 嘅日式早餐所以行完個大鳥居之後都有啲肚餓。之前係書裏邊有介紹一間宮島本地嘅coffee shop Sarasvati - 喺嗰度飲咗杯咖啡同埋食咗個抹茶雪芳蛋糕。飲完咖啡食件蛋糕之後係街口見到一間賣蠔嘅鋪頭仔又買咗兩隻蠔來食 - D蠔好大好新鮮同埋好有海水味。最重要嘅係只要400 Yen咋!


Sarasvati Coffee Shop
Japan, 〒739-0588 広島県廿日市市宮島町 宮島町407
https://goo.gl/maps/tx9HxZZrDH42

とりい 蠔
Japan, 〒739-0521 Hiroshima Prefecture, Hatsukaichi, 宮島町大町1144
https://goo.gl/maps/qvBeRDk96mv

400 Yen only


好大隻呀!


炒豆機 - 我都買咗兩包咖啡豆返香港比香港平


咖啡好飲但係個蛋糕就真係麻麻 - 個蛋糕太濕同埋冇乜抹茶味


宮島空中纜車

睇完個大鳥居之後,我地行去坐空中纜車嘅免費shuttle去紅葉谷公園坐纜車。等緊免費巴士嘅時候又再見到好多可愛嘅鹿。

免費巴士原來唔係好密同埋佢哋會放lunch所以最好唔好食晏時間去坐免費巴士。

纜車係要坐兩次嘅 - 第一段嘅纜車(有啲似海洋公園小纜車)係先會從紅葉谷站到榧谷站跟住再要轉大纜車去終點嘅獅子岩站。

由獅子岩展望台要行大概半個鐘頭先會去到彌山山頂, 中間會經過靈火堂可以睇到已經持續燃燒左約1200年嘅火焰。因為今次係同媽咪一齊嚟所以費事行咁遠去到山頂淨係行到靈火堂就算啦。其實果半個鐘頭都唔係行得好辛苦,所以如果大家有時間我都建議大家行到去山頂。日本人真係好有禮貌,行山經過啲日本人都會同你講Ohayo。

我哋大概係山上面兩個鐘頭跟住就搭返纜車落嚟。記住要帶水因為上面唔係有好多販賣機。

小鹿baby


巴士時間表 - 記住12:05過後就要等到1點


有啲似海洋公園纜車


大纜車睇出嚟嘅風景


獅子岩展望台嘅風景


其實都唔係行得好辛苦同埋途中嘅風景都幾靚架


燒咗1200年嘅火



參拜通​​道商店街(宮島表參道)

行完山之後真係好肚餓!參拜通道其實係一條手信街,有好多本地嘅手信可以買同埋有好多嘢食。

我試咗兩間賣紅葉饅頭嘅鋪頭但係覺得好普通同我哋喺759買嘅差唔多。

商店街其實唔係好長但係都有好多鋪頭俾你行


我哋食咗好多小食 - 魚卷(好有魚味),紫薯雪糕,穴子饅頭,烤蠔 (但係我都係覺得第一間好味啲)。


うえの

廣島另外一個名產就係穴子(即係海鰻)。最出名嘅餐廳原來就係宮島口站附近所以我哋決定坐船返嚟之後食。其實去到餐廳已經下晝3-4點但係都有好多人喺度食緊。

餐廳淨係得一個Menu - 大中細嘅穴子飯,因為之前已經係參拜通道掃街所以我哋叫咗個細嘅穴子飯。

うえの
1 Chome-6 Miyajimaguchi, Hatsukaichi, Hiroshima Prefecture 739-0411, Japan
https://goo.gl/maps/SDKCyJGCC8u

Menu - 穴子飯only


細嘅穴子飯 (都好多飯)-值得一試!


原子彈爆炸圓頂屋(原爆圓頂)

提起廣島大家都會諗返起以前悲傷嘅歷史...電車站一出來就會見到係歷史書裏成日見到嘅原子彈圓頂屋。我諗好多鬼佬對呢一個景點好有興趣,我一邊行都見到好多外國嘅遊客。

有草地嘅電車軌


原子彈爆炸圓頂屋


側邊嘅河邊


廣島平和紀念公園

平和紀念公園係原子彈圓頂屋對面,個公園好靚好大。因為去到平和紀念公園已經五點半所以都冇機會去個博物館,如果下次有機會我都希望可以去睇一睇。

原子彈爆炸之子像-紀念因核爆造成白血病而去世嘅佐佐朩禎子同埋係核爆中犧牲嘅小朋友。


原子彈爆炸逝世者紀念碑 -碑文寫住 "靜靜的安息 不會再重蹈覆轍"


和平紀念資料館


廣島本通商店街

紀念公園附近行過D就會到商店街。商店街唔係太長但係好多野睇同埋都有啲幾特別嘅鋪頭仔。

因為實在食得太飽所以決定今晚嘅晚餐就係酒店附近嘅超級市場買減價便當做晚飯。但係廣島嘅超級市場同埋百貨公司都幾早閂門,百貨公司居然七點半就閂!

Shop shop shop


第 3 天 (2015/10/06) D3

岡山Toyoko Inn東口

點解會揀去岡山呢?其實一開始揀呢一個地方係因為坐船去直島比較方便,但係上網睇咗啲資料先發現原來都有好多其他野睇例如日本三大名園嘅後樂園同埋好大嘅Aeon Mall 喺正岡山車站隔離。

今次住嘅Toyoko Inn 喺車站嘅東口,由新幹線站出來行五分鐘就到。附近有好多餐廳同埋好多pachinko鋪頭,一開始我有啲擔心夜晚會好嘈但係都唔會。間酒店幾新因為呢一次酒店係俾我哋門卡唔係俾鎖匙。

岡山後樂園

擺低行李係酒店之後就坐電車去咗後樂園 - 今日天氣好好,太陽好大令我心情特別開心。

係網上面好多人介紹要食門口間手信店嘅雪糕所以我哋都整返一杯。

可能今日係平日所以後樂園裏面都唔算有太多人...成個花園好大同埋都好靚不愧佢係日本三大名園。 裏面亦都有好多涼亭俾人唞暑同埋俾人喺裏面食便當 - 早知我應該學其他老人家一樣自己帶個便當,一邊食一邊欣賞風景。唔知點解亦都見到好多西裝人士自己一個人行花園...唔通出差順便來欣賞一下個花園?

坐新幹線由廣島去岡山-大概半個鐘頭就到


後樂園門口買嘅蒜山雪糕 -好有奶味


後樂園後面就係黑色嘅岡山城


今日天氣真係好好,影出嚟嘅相都好靚


可以抖涼嘅涼亭-好多老人家喺度食便當


稻米田


茶園


好溫馨嘅畫面


岡山一番街

因為冇乜點research岡山有咩嘢食所以決定喺酒店附近嘅岡山一番街食lunch。我哋揀咗一間食定食嘅日式料理餐廳 (唔記得叫咩名但係應該好容易搵因為都幾多人排隊)。我哋叫咗個侍應介紹嘅烤魚定食同埋岡山出名嘅炸豬扒。

烤魚定食 -都幾好味


岡山出名嘅咋豬扒定食-好普通


AEON MALL 岡山

喺一番街可以經地下通道行到去Aeon Mall - 個mall真係好大好多野行,我哋行咗至少有3個鐘但係都未睇晒所有嘅鋪頭。呢度買衫唔會太貴但係鋪頭買嘅嘢都好似都差唔多。

賣手信嘅area, 後面係Aeon supermarket


個mall太大啦...


雪丿下

行到攰晒居然比我見到出名嘅pancake shop-雪之下!係東京大阪好多人排隊但係呢度居然唔使喎 - 間鋪頭有少少隱蔽(係Subway隔離)。

抹茶pancake - 記住要淋隔離嘅抹茶醬


小豆島拉麵HISHIO

嚟咗日本咁耐都未食拉麵 - 今晚終於食到啦。呢間拉麵喺車站附近好容易搵,裏面嘅裝修都幾elegant唔似一般嘅拉麵店。通常呢類型嘅拉麵店都係女仔鍾意去但係surprisingly都有很多大叔係裏面。我哋叫咗兩款拉麵 - 豬骨(未影相媽咪已經食左)同埋鹽味 - D拉麵幾好味但之前食過跟更加好嘅。

小豆島ラーメンHISHIO
2-23 Honmachi, Kita Ward, Okayama, Okayama Prefecture 700-0901, Japan
https://goo.gl/maps/eKbpRa5fVZU2

鹽+柴魚味拉麵


跟豬骨拉麵嘅飯 - 唔可以散叫一定要跟拉麵。我唔鍾意食飯嘅人都覺得好好味!


第 4 天 (2015/10/07) D4

直島

又係喺Nippon Rent a Car租車 - 今次決定租平D唔再租Hybrid。攞完車之後就揸去宇野站搭船去直島。由岡山揸去宇野要成40分鐘因為朝頭早有D塞車。日本啲標示唔係咁齊全所以搵左一陣間先搵到個碼頭,成個船程好快差唔多10-15分鐘已經到直島。島上唔係好多車所以揸車都幾方便。

我哋係直島參觀左兩個Art Gallery (Benesse House & 地中美術館)。 如果兩個美術館比較我會覺得地中美術館比較值得去 - 裏面嘅art collection 好特別同埋佢哋用咗好多 architectural design來襯托啲藝術品。

平日嘅直島真係好悠閑,我見到好多遊客都自己租單車周圍踩。但係最好唔好星期三去因為原來好多餐廳都唔開。

如果揸車嘅話係唔可以直接揸到去Benesse House, 要喺附近停車場擺低架車- 個停車場都幾遠下。其實自駕去直島幾方便,島上面有好多免費停車場所以唔使驚無位泊車。如果唔揸車嘅話其實都可以喺tourist centre 嗰度租單車踩。

今次租Honda N Box


聽我日本同事講原來之前颱風曾經吹走個南瓜


Benesse House 嘅風景 - 個美術館都有自己嘅酒店,大家可以試吓住一晚。


裏面唔可以影相所以淨係影咗出邊 - 大家一定要去。


倉敷美觀地區

喺直島大概玩到3點就揸返出嚟市區去倉敷美觀地區。講真其實冇乜特別,同我之前去高山嗰啲地方差唔多。去到都已經差唔多四點幾所以唔係有好多人同埋好多鋪頭已經開始閂門所以大概行左一個鐘就算。

河有少少污糟


個壕餅都幾特別


三井暢貨園區 倉敷

其實成個trip到依家都冇乜見到香港人但係去到呢個outlet就見到好多同鄉!香港人真係鍾意shopping。

Outlet都幾細,行左個零鐘已經行晒。啲嘢唔係好平所以我係淨係買一對Nike波鞋 (3200 yen) 就算。

回転寿司 すし丸

行完outlet就去隔離嘅mall食旋轉壽司。呢間餐廳係Tabelog嘅評分都好高分但係我覺得水準一般。

個壽司師傅都幾靚仔,一路對住我地笑(好想影佢嘅相)。佢最後仲叫個侍應要用英文同我地say Thank you。

KAITEN SUSHI SUSHIMARU
Ario Kurashiki, 12-2 Kotobukicho, Kurashiki, Okayama Prefecture 710-0813, Japan
https://goo.gl/maps/VAznZvJJxFT2

唔新鮮


第 5 天 (2015/10/08) D5

Honmachi Commons

岡山Toyoko Inn D 早餐都幾難食所以我前一晚research一下酒店附近究竟有乜嘢Cafe朝頭早係會開嘅。呢間Cafe喺酒店附近大概行5-6分鐘就到...啲嘢都幾好味同埋杯咖啡唔錯。

本町コモンズ
10-22 Honmachi, Kita Ward, Okayama, Okayama Prefecture 700-0901, Japan
https://goo.gl/maps/tXkqowUx2hM2

Pancake set - 600yen


Toast set - 500 yen


瀨戶大橋

呢一次日本自駕之旅都破左紀錄,居然一日行左三個大橋。

瀨戶大橋 - 由岡山去高松
鳴門大橋 - 由德島去淡路島
淡路神戶大橋 - 由淡路島去神戶

瀨戶大橋真係好長,Wikipedia 話條橋原來有成13公里!因為天氣好好所以一路嘅風景都好靚。

うどん一福

呢次好快經過高松,淨係係度食咗兩餐,希望下一次會有多啲時間去遊覽四國。

呢間烏冬餐廳喺Tabelog上面評分好高架 - 有成3.8分! 我哋揸到去係啱啱食lunch嘅時間,出邊嘅停車場差唔多泊滿曬車。個餐廳其實好似食堂一樣入到去排隊跟住將你想食嘅嘢擺係個餐盤度,但係最後都係要用日文同佢講你想點乜嘢類型嘅烏冬。因為我日文有限所以我都係叫佢推薦佢店裏面出名嘅烏冬。

啲烏冬真係好好味比我哋喺Citysuper買嘅讚岐烏冬好太多。新鮮嘅烏冬特別彈口再加一啲蔥,薑,同埋蘿蔔蓉就可以食啦。如果大家經過高松一定要試呢一間餐廳!

うどん一福
Japan, 〒769-0101 Kagawa-ken, Takamatsu-shi, Kokubunjichō Nii, 169−1 うどん一福
https://goo.gl/maps/tTp5nxK7nV52

好似快餐店一樣嘅飯堂


好多炸物可以選擇


最後揀咗三款炸物


凍嘅烏冬


原來佢東京都有分店架


夢菓房たから

食完飯就一定要食甜品!因為媽咪鍾意食大福所以我前一晚都係網上面research一下究竟高松有乜嘢甜品可以食。

呢間日式菓子店大概離食烏冬嘅餐廳10分鐘車程左右,鋪頭出邊有個好大嘅停車場所以好方便。
鋪頭好大有好多唔同嘅日式菓子可以買。入到去記住要攞個Number跟住等佢叫,我哋呢次揀咗四款大福 - 無花果,栗子,梨,同埋金時番薯。鋪頭裏面有個area係俾人堂食仲有免費嘅熱茶可以飲添,所以我哋坐咗係度嘆一嘆啲大福。D大福嘅皮好煙韌 ,裏面嘅餡亦都唔會太甜真係好好味!

株式会社夢菓房たから
214 Kasugacho, Takamatsu, Kagawa Prefecture 761-0101, Japan
https://goo.gl/maps/JHHfJq2UUHq

好多人排隊,我哋都等左成10分鐘


一定要去試呀


淡路島土產店

食完甜品之後就揸車去淡路島,由IC出嚟就見到一間賣土產嘅鋪頭。因為已經下晝3點幾剩低嘅蔬菜生果唔係太多。其實裏面有好多其它野買但係驚會超重所以我哋淨係買咗淡路島出名嘅洋蔥,無花果同埋金時番薯。我哋買嘅蔬菜水果會寫咗農夫個名都幾特別。

一籃籃農產品


好多洋蔥


無花果好香比香港啲土耳其無花果好好多


我個日本同事話我應該買大嘅洋蔥但係因為好重所以我都係揀咗一包細洋蔥


金時番薯


淡路島夢舞台

睇完土產店就揸咗去淡路島夢舞台,因為去到已經差唔多4點所以唔係太多人。啲人講到淡路島夢舞台好靚但係我覺得一般啦...我哋影咗D相跟住就走。




本福寺

木福寺係淡路島附近所以我哋順便到參觀埋。去到已經差唔多四點半,成個寺廟都無人。其實淡路島真係唔係太多嘢睇...

淡路神戶大橋

條淡路神戶大橋真係好長同埋橋上面好大風。我架Honda N Box 係橋上不斷咁震,我差啲驚架車會俾風吹走,真係嚇鬼死我囉!

好大風


グリル一平

去到神戶已經差唔多夜晚6-7點,真係好鬼肚餓。原本係想去食牛丼飯但係行到餐廳發現已經閂左所以我即刻揀咗附近嘅洋食屋。間餐廳係條巷仔裏面,夜晚7:30-8點都仍然有好多客人係度食緊飯。

之前去東京好多餐廳都有英文Menu,我諗住神戶都係一個大城市同埋呢間餐廳都幾出名所以都應該有英文Menu...點知係冇嘅...所以我唯有看圖識字咁揀左兩樣野食。我哋叫咗好多人叫嘅蛋包飯同埋炸牛扒。

個蛋包飯真係好好味,裏面嘅蕃茄炒飯 (應該係特製嘅) 比我哋之前係名古屋食嘅好太多啦 但係我覺得個demi glacé sauce有少少偏鹹。炸牛扒就一般但係牛肉都幾好味,塊扒好大塊所以食完好飽。

グリル一平
5 Chome-5-26 Kotonoocho, Chuo Ward, Kobe, Hyogo Prefecture 651-0094, Japan
https://maps.google.com/?q=〒651-0094 Hyogo Prefecture, Kobe, Chuo Ward, Kotonoocho, 5 Chome−5−26, グリル一平&ftid=0x60008ee5a1079b97:0x1f6380d78f039ce&hl=en&gl=ca

餐廳出名嘅蛋包飯


炸牛扒


Patisserie Tooth Tooth

食完晚飯一定要食甜品!神戶出名好多cake shop所以一定要食。我揀咗書介紹嘅Patisserie Tooth Tooth 叫咗兩件蛋糕 - 栗子蛋糕同埋提子蛋糕。個栗子蛋糕D栗子味好香好濃郁,個提子蛋糕都唔錯但係我覺得個栗子蛋糕好味啲。

食到停唔到口嘅栗子蛋糕


有少少偏甜


鳴門鯛燒本舗 阪急三宮站前店

食完蛋糕之後我哋決定係三宮站附近行一行睇吓附近有啲乜嘢,行吓行吓居然比我地見到一間賣鯛魚燒嘅鋪頭。個鋪面都幾大所以我哋決定試吓叫一隻紅豆鯛魚燒來試一試。個鯛魚燒真係一流 - 熱辣辣,煙煙韌韌,冬天食嘅話會更加正。

個鋪頭都開到夜晚11點所以我哋決定之後幾日再返嚟食。

鳴門鯛焼本舗
Japan, 〒650-0012 Hyōgo-ken, Kōbe-shi, Chūō-ku, Kitanagasadōri, 1 Chome−9−6 鳴門鯛焼本舗
https://goo.gl/maps/HKVSqNmARQ52

好大嘅招牌


新鮮熱辣嘅鯛魚燒


皮好煙韌


東橫INN神戶三宮2

呢個Toyoko Inn 嘅地點方便,由車站東口行過嚟都係幾分鐘。附近有超級市場,便利店同埋好多餐廳選擇。因為之前我哋住夠10晩所以今次我地有一晚係free嘅!

呢幾次去日本都會住Toyoko Inn 因為佢個位置通常都好方便,需然房間有D細但係乾淨同埋又平 - 我今次住 Twin Room都只係$400-$500幾港幣。

第 6 天 (2015/10/09) D6

西村咖啡 三宮店

因為實在唔太鍾意食日式早餐同埋酒店嘅咖啡真係好唔掂所以決定去附近嘅coffee shop。神戶其實都有好多出名嘅coffee shop 而西村咖啡就係其中一間。

呢度嘅早餐比較貴,要800 Yen一份,但係份量好大同埋好味。最重要嘅係可以滿足到冇咖啡就唔得嘅我。

にしむら珈琲三宮店
Japan, 〒651-0094 Hyogo Prefecture, Kobe 中央区琴ノ緒町5丁目3−5 グリーンシャポービル
https://goo.gl/maps/1rU7hAQyr4S2

日本煙肉好好味


炒蛋set



Ca Marche

食完早餐之後就決定去試一試神戶出名嘅麵包店,神戶其實有好多出名嘅麵包店但係呢一間好似係最高分嘅所以就決定試一試。

個鋪頭都幾隱蔽好容易就會行過,我哋大概9-10點去到已經有好多人喺度買麵包。鋪頭裏面啲人嘅英文好好所以溝通上冇問題。

サ・マーシュ
Japan, 〒650-0003 Hyōgo-ken, Kōbe-shi, Chūō-ku, Yamamotodōri, 3 Chome−1−3 サ・マーシュ
https://goo.gl/maps/VJnYJp6g2z72


個鋪頭好似成日都會休息


北野異人館

其實神戶真係唔係太多嘢行,北野異人館係其中一個景點所以都係要行一行嘅。啲異人館係山上所以行上去都有少少辛苦。我哋冇俾錢入去參觀淨係喺出邊行左一圈同埋影咗D相當做到此一遊。

風見雞之屋


PLAISIR

喺神戶一定要食神戶牛扒,我係網上面見到好多人介紹呢一間餐廳所以好早之前已經book咗枱。我哋坐counter位,周圍附近嘅客人都係香港台灣人令我擔心究竟呢一間餐廳究竟掂唔掂。

我哋叫咗兩個set,一個8000yen,一個10000 yen(10000 yen 嘅set係有魚食嘅)。啲牛扒真係幾好味但係唔會令我想再返嚟食多次。

神戸プレジール
〒650-0011 Hyogo Prefecture, Kobe, 中央区下山手通2丁目11−5, ホテル ザ・ビー神戸 1F
https://goo.gl/maps/dYjxtGwtQfz

我哋坐counter


有啲怕羞嘅廚師


呢個係兩份嘅份量


啲魚都幾細塊


神戶牛扒



兩人份量


三宮商店街

我發現原來日本D車站隔離一定係會有商店街 - 三宮商店街都幾大同埋好多野睇(e.g. Flying Copenhagen) 但係之前我哋係唔同城市已經shopping過所以行一行就算。

心齋橋(固力果廣告牌)

行完商店街之後我哋就坐JR去大阪 (大概20分鐘)。我帶咗媽咪去心齋橋睇出名嘅Glico 廣告牌但係似乎嚇親我媽咪因為實在有太多太多嘅大陸人啦。周圍嘅人都講緊普通話或者廣東話好似返咗去深圳一樣都幾無癮吓...

我哋行咗大概15分鐘就即刻決定去黑門市場。

好多國內同胞嘅心齋橋


黑門市場

瀨嘢啦!去到黑門市場發現都係中國台灣香港人。 鋪頭D牌係用中文字寫叫人唔好掂佢哋啲嘢,都幾失禮。

黑門市場買嘅嘢都幾貴同埋都唔係好新鮮所以我哋行咗大概半個鐘就離開。

搵笨嘅黑門市場


地魚屋台

我哋喺大阪梅田站shopping到八點就決定返去神戶食晚飯。其實之前去大阪已經想試呢一間居酒屋但係冇時間去試。

我又再一次以為神戶嘅餐廳係有英文或者中文Menu....但係都係冇嘅...所以又要靠Google Translate 同埋日文字典apps幫手。

我哋叫咗好多魚生,天婦羅同埋烤物 - 啲食物其實普通但係餐廳氣氛幾好,D人飲到high哂。呢一餐飯都幾貴最後要5000 Yen埋單。

https://goo.gl/maps/CFvGFUPDuxz

全部日文嘅Menu,相都冇一張


鳴門鯛燒本舗 阪急三宮站前店

我嘅日本同事同我講原來呢間鋪頭出名嘅唔係紅豆鯛魚燒而係金時番薯鯛魚燒,所以我哋今晚決定又再返嚟食。

食完番薯味嘅鯛魚燒我都係覺得紅豆味好啲!

第 7 天 (2015/10/10) D7

京都車站

由三宮有JR直接去京都,車程大概要一個鐘頭左右。我哋大概八點半出發去到京都車站已經有好多遊客。記得要買1日巴士飛 (500yen) 因爲坐巴士會方便過坐地鐵。

清水寺(清水舞台)

星期六日真係唔好去京都,好多本地同外國遊客。成個清水寺好似街市一樣咁熱鬧,我哋去咗清水舞台影咗D相好快就行返出嚟。下次去都係最好揀返平日...


街市咁熱鬧


奧丹 清水

呢間豆腐餐廳係清水寺附近,我諗呢間餐廳都幾出名我見到好多人係外面影相。我之前已經叫我日本嘅同事幫我訂位所以一入到去就有位座。

個女將都幾搞笑,佢用佢有限英文同我地溝通仲叫我記住影D食物- 我哋叫咗一個普通豆腐set同埋一個特別豆腐set。其實兩個set都係差唔多淨係豆腐有啲唔同。呢間餐廳係要坐地下所以坐到差唔多腳都有少少痹。

我都係覺得我之前係東京食嘅豆腐餐廳比較好味。

総本家ゆどうふ奥丹 清水
Japan, 〒605-0862 京都府京都市東山区清水3丁目340
https://goo.gl/maps/jtMAsJqFJRF2


% Arabica Kyoto

係日本已經飲咗好多日日式咖啡,真係好想飲番一杯好飲嘅Cappuccino。% Arabica 喺香港Discovery Bay 同埋中環都有分店,我之前係中環試過佢哋嘅咖啡但係我覺得麻麻哋...

個Barista真係幾型仔同埋佢拉嘅花好靚,京都店嘅咖啡真係比香港好好多。

% Arabica Coffee
Japan, 〒605-0853 京都府京都市 東山区星野町87-5
https://goo.gl/maps/9p46P9GgTSG2

好cool嘅店面


好多外國人


型仔barista


鍵善良房 本店

上次嚟到袛園已經5-6點所以鍵善良房嘅Cafe閂咗門,冇機會坐低食只好買一盒蕨餅當做嚟咗。返屋企打開包蕨餅食,先發現原來好好味,好快就食晒一盒。鍵善良房蕨餅用嘅黃豆粉特別香比清水寺附近賣嘅好好多 - 如果嚟到祗園一定要入嚟買一盒返去食!

今次嚟到係下午時間所以終於可以坐低嘆一個下午茶。

鍵善良房 本店
264 Gionmachi Kitagawa, Higashiyama Ward, Kyoto, Kyoto Prefecture 605-0073, Japan
https://goo.gl/maps/M7L5dUnNtAS2

Tea一Tea


錦市場

行完祗園,買咗啲抹茶手信跟住就行去錦市場。一開始都有D擔心會好似大阪黑門市場,全部都係遊客但係都見到好多本地人喺度行。

我哋喺度都行左一排,買咗食咗啲好特別嘅食物滿足而歸。我覺得錦市場會比大阪黑門市場值得一行。

間鋪頭可以幫你剝咗栗子殼


衹園萬屋(香蔥烏龍麵)

我哋決定今晚試京都好出名嘅香蔥烏龍麵,大大話話都等左成40分鐘先食得到。有好多本地人同埋外國遊客同我地一齊排。

其實我覺得碗烏龍麵OK啦,如果要排隊嘅話就唔使啦。


伊勢丹 京都店

食完飯見到仲有時間就即刻衝番去車站嘅伊勢丹去買手信。呢度有好多京都限定嘅抹茶手信,所以一定要留番啲時間嚟行一行。

呢次買嘅Henri Carpenter 抹茶financiers 好好味,好快就食咗成盒。

第 8 天 (2015/10/11) D8

Cafe FREUNDLIEB

係神戶最後嘅一日決定要再試多一間麵包店。呢一間麵包店離酒店10分鐘都唔算太遠,最特別嘅係佢係一間教堂裏面嘅麵包店。

我叫咗一個egg and sausage set 跟住可以自己揀兩種麵包...好失望因爲啲麵包好普通。我食完早餐之後外邊已經有好多人排隊 - 我覺得呢間鋪頭嘅gimmick只不過係因為佢係教堂裏面。

フロインドリーブ
Japan, 〒651-0092 Hyogo Prefecture, Kobe, 中央区生田町4丁目6−15
https://goo.gl/maps/jpgM9yS4gqy

2樓嘅cafe


普通嘅麵包


神戶牛丼 廣重

我哋決定中午試一試我哋之前想試嘅牛丼飯 - 我哋11點去到居然都要等成個半鐘!
點解要等咁耐呢因為呢一間餐廳係真係用神戶牛肉而個牛丼飯只不過1200 yen。成個餐廳得10個位同埋一個廚師(waiter都無)所以要等好耐。

啲牛肉好柔,好似融左係個口裏面...再點啲蛋漿更加一流。
如果唔需要排隊,我都想encore多一次。

廣重牛丼
Japan, 〒650-0004 Hyogo Prefecture, Kobe 中央区中山手通り1丁目22-21 前川ビル1F
https://goo.gl/maps/cRThJjhmVxy

Menu - 普通size同埋大size嘅牛丼飯


並み牛丼 - 即係普通size嘅意思


有埋證書!


廚師有D似劉青雲,黑黑實實


廣島機場

眨吓眼就已經第八日要返香港啦...呢一次嘅日本旅程真係好好玩,去咗好多一啲平時唔係咁多人去嘅地方。雖然去咗八日但係太多景點想睇變咗每一個城市都係留兩晚就要去下一個。

我同媽咪都覺得廣島比名古屋好玩所以我都會繼續留意之後有冇fanfare去廣島,或者下次就去博多方向出發!

2 則留言

  • 愛莉絲

    那個香蔥烏龍麵....蔥多也太誇張了吧^^"

    5年前 (2015-10-20)
  • 我愛日本

    題目應該是廣島關西八日遊...呵呵

    5年前 (2015-10-19)
登入發表留言