【東京西麻布|L'Effervescence】再接再厲，五千円食到盡第二彈！
首先，要介紹一下這間L'Effervescence餐廳 （Sorry個名好難讀，就算跟日文發音都超蹺口）。 在Tabelog排行東京餐廳第三位，評分4.51分，米芝蓮兩粒星星，屬法國創作料理。本以為好難Book，點知出奇地網上預約三星期後的午餐完全冇問題。太容易可能覺得唔希罕，不過我今天再嘗試預約午餐，最快都要個半月後。呀，原來是自己好彩咋！
餐廳的位置非常奇特，並唔係響大街大巷又或者鬧市之中，而是隱藏在西麻布住宅區一棟不起眼的平房，驟眼看跟其他住宅差不多無分別，完全不為意這居然是一間餐廳。它的對面有一間非常大的長谷寺，算是唯一的識認。
在網上找地址的時候，已經覺得好面善 （畢竟餐廳位於咁怪嘅地段都冇幾多間），來到之後見到入面嘅卡位，就肯定自己以前係嚟過嘅。。 不過係十年前。這間餐廳開業四年，前身（即我光顧過的那間）是集團的另一間餐廳，原来系咁，我仲特登搵番十年前的照片嚟比對一下。哈哈，不過十年前小女子太令女，驚嚇親人，所以特意遮住，請不要見怪。
Anyway，一踏入門口，就有好親切嘅waitress嚟歡迎，帶我們先去偏廳等候，順便將我哋嘅外衣和手挽袋都收起來 （唉，又讓我諗起京都祇園丸山的經歷。。 呢啲先叫今時今日嘅服務態度丫嘛，華仔呵！）不消一會兒，侍應就帶我哋過去另一邊的用餐區。餐廳不是很大，大約得十多張枱，三個半圓形的卡位。我哋當日是閒日，但係Lunch都full哂。
Lunch有三款Set Menu供選擇，分別是7800円的晚餐Mini Version，和兩個五千円的Lunch Menu。我的朋友一馬當先揀了蘋果批為主菜的『Through the pathway...』，我也為了要堅持以最低價錢享受至高美食的原則揀了另外一款5000円Lunch Menu『Where the ocean meets the land～』。 聽個名係唔會知道食D咩嘅，咁易俾你估到就唔係創作料理啦。
首先係今天嘅Amuse－Bouche。一定要提提法籍經理Zach （全名 Zacchari Touchane），每道菜上的時候，佢就會跳出嚟，像講故事一樣介紹。其實其他餐廳上菜也會解釋每道菜的食材做法，但係一般都好似機械人播放錄音機一樣，好少好似Zach解釋得咁清楚咁精彩。記住呀，佢未講完係唔可以食架，就算你已經拎起個叉流晒口水好想開始拮落去，還是要乖乖地聽。左面是西芹打成的泡泡，裡面藏了安康魚肝和提子乾，側邊的係液氮化的西芹粒。
放心，麵包係真的麵包嚟嘅。留意牛油上面是餐廳的Logo。Zach夾麵包上碟的時候弄翻了，朋友說OK這就可以啦，但係Zach話唔放番好，他夜晚會瞓唔著㗎，堅持要重新夾番正。
接著是我的『smell of the ocean~』好靚呀D葉
叫金線蓮 （Nasturtium）。 中間是好爽好清甜的筍，配以鮑魚和日本菇，再淋上充滿海藻的沙巴翁汁。就是一月時令的海藻令這碟菜充滿濃濃的海洋氣味，所以叫Smell of the Ocean。。。
朋友吃的是『very very cold day~』，但係據講這道菜是要營造好似冬日裏生的紅紅烈火。。。 紅色的是馬肉刺身，裡面包裹著的是。。。 鱈魚。。。白子。。。 well。。 好Exotic的一道菜式，好適合勇於嘗試不怕死的你，嘻嘻！ 都係伴碟的烤小椰菜，白果，紫羅勒比較正常D。不過，賣相好有心思好靚啊抵讚！
然後是這間餐廳的signature dish，所有Course無論午餐晚餐都必上的這道菜，一年三百六十五日都一樣樣，蘿蔔一個 （Farm Heroes裡面成日見個隻肥嘟嘟Turnip），不過味道會隨着季節不同而有所變化。
到我嘅主菜啦 ～ 『Wintery field～』， 係頂級和牛嘅Pat Pat肉，貪佢夠瘦喎。奇怪咁紅嘅肉，切嘅時候一D血都冇流出嚟。 配碟嘅椰菜好新鮮好清甜，伴以辣根奶油醬（Horseradish cream）。
嘩！朋友的14號蘋果批，不過係冇蘋果嘅。人家叫『From an idea of apple pie #14~』， Idea咋。。所以係冇蘋果嘅。不過賣相真係一絕，令到好似個花圈咁。好羨慕呀！圍住蘋果批嘅係由五十幾種新鮮蔬菜做成嘅沙律（流晒口水啦！），而蘋果批個餡呢，就有野豬面珠登，蓮藕，鵝肝，小龍蝦，無花果等等（都話冇蘋果囉！）五千円可以食到咁嘅手工菜，係咪發緊夢呢！
說時遲那時快，又到甜品嘅時候。先睇睇朋友吃的Limocello baba & banana，limocello baba係法式甜品，類似浸咗酒嘅sponge cake，配以香草醬和Rum酒雪糕。
我的呢？天使蛋糕，但係係有咖啡味嘅，原來加咗蒲公英根部（Dandelion root)（唔講真係唔知蒲公英根係有咖啡味）, 仲有烤南瓜。
唔好以為5000円就係淨得這五個Course，好戲在後頭。先來個會變色的藍色Herb Tea。初頭是藍精靈，到第二次嘅時候已經變咗史力加。
送茶的Petit Four先最精彩。嗰個朱古力珍寶珠，並唔係一粒普通嘅珍寶珠，裡面有提子乾，仲有。。。 爆炸。。。糖！ 好Cutie呀！個蘋果仔裡面係果汁，一定要一口吞咗佢，唔係D汁會飛哂出嚟。
臨走，Zack仲俾咗佢嘅咭片我哋，話下次book唔到位，可以Email佢。（Wow，係咪真係可以插隊先？）佢仲醒咗兩件蛋糕仔比我哋，我之後食咗都好好味架，早知買幾件嚟做手信啦。
五千円可以食到米二星法國餐廳，只有兩個字 ～ 『抵到爛！』唔食點對得住自己先？
レフェルヴェソンス （L'Effervescence）
東京都港区西麻布2-26-4
03-5766-9500